4SİM Azərbaycan / C4IR Azerbaijan

“Sənaye 4.0 texnologiyaları və iqlim dəyişmələri” mövzusunda “4SİM Talks” tədbiri keçirilib Tədbirdə iqlim dəyişikliyi ilə mübarizədə sənaye 4.0 texnologiyalarının rolu müzakirə olunub. İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin (4SİM) təşkilatçılığı ilə COP29 çərçivəsində “Sənaye 4.0 texnologiyaları və iqlim dəyişmələri” mövzusunda növbəti #4SİMTalks tədbiri keçirilib. 4SİM-in icraçı direktoru Fariz Cəfərov iştirakçıları salamlayaraq qurumun fəaliyyəti və “4SİM Talks” təşəbbüsü barədə məlumat verib. Qeyd olunub ki, bu təşəbbüs dövlət, özəl sektor, eləcə də elm-təhsil müəssisələrinin 4-cü sənaye inqilabı texnologiyaları, onların tətbiqi sahələri, üstünlükləri, uğurlu həllər haqda məlumatlandırmaq və Elm-sənaye klasteri 4.0-ın formalaşdırılması məqsədilə həyata keçirilir. Beynəlxalq ekspertlər “Plug and Play” Texnologiya Mərkəzinin enerji və davamlılıq rəhbəri Vade Bitaraf, “BrainboxAI” şirkətinin baş direktoru Sam Ramadori və “Google” şirkətinin Mərkəzi Asiya, Qafqaz, inkişaf etməkdə olan bazarlar, hökumətlə əlaqələr və dövlət siyasəti şöbəsinin rəhbəri Olqa Skoroxodova müvafiq olaraq “Enerji sahəsində fəaliyyət göstərən startaplar”, “Enerji sərfiyyatının optimallaşdırılmasında Süni intellekt” və “İqlimdə rəqəmsallaşmanın rolu” mövzularında təqdimatla çıxış ediblər. Sonda beynəlxalq ekspertlər tədbir iştirakçılarının suallarını cavablandırıblar.

Noyabrın 16-da COP29 çərçivəsində Elm, texnologiya və innovasiya günüdür. Bu münasibətlə, İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM) hər kəsi süni intellekt mövzusunda təşkil olunan 2 panel sessiya dəvət edir. Saat 11:30 - Yaşıl Zona, Trade and Investment House (D10) “Süni İntellektin transformativ gücü: Ətraf mühitə təsirlərin azaldılması və dayanıqlı inkişaf” mövzusunda panel sessiyası. Saat 17:00 - Mavi Zona, Trade and Investment House (B4) “Süni İntellektin təsiri: Texnoloji proqnozlaşdırma ilə rəqəmsal iqtisadiyyatda idarəetmənin yeni dövrü” adlı panel sessiyası.

4SİM Talks: İqlim problemlərinin həllində sənaye 4.0 texnologiyaları Yerlər məhduddur! Qeydiyyat üçün: https://lnkd.in/eHSgPJAj Dördüncü Sənaye İnqilabının Təhlili və Koordinasiya Mərkəzinin (4SİM) təşkilatçılığı ilə noyabrın 15-də növbəti #4SİMTalks tədbiri keçiriləcək. COP29 ərəfəsində keçirilən tədbir iqlim dəyişikliyi ilə mübarizədə sənaye 4.0 texnologiyalarının rolu mövzusuna həsr olunacaq. Beynəlxalq ekspertlər enerji sərfiyyatının optimallaşdırılmasında süni intellekt, iqlim problemlərinin həllində rəqəmsallaşmanın rolu və enerji sahəsində fəaliyyət göstərən startaplar mövzusunda təqdimatla çıxış edəcəklər. Ünvan: Hyatt Regency oteli, Quba zalı Tarix: 15 noyabr, saat 18:30 Tədbir ingilis dilində olacaq

Dayanıqlı inkişaf liderlərinin görüşü keçirilib Görüşdə enerji keçidi, təbii resursların idarə edilməsi və iqlim tədbirlərinin gücləndirilməsi sahələrində strateji əməkdaşlıq müzakirə olunub. COP29 çərçivəsində İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM) və Dünya İqtisadi Forumunun (DİF) 4-cü Sənaye İnqilabı Mərkəzləri şəbəkəsinin təşkilatçılığı ilə iqlim fəaliyyəti və dayanıqlı inkişaf sahəsində əməkdaşlığı təşviq etmək üçün yüksək səviyyəli liderlərin iştirakı ilə görüş təşkil olunub. Görüşdə 70-dən çox yerli və beynəlxalq şirkətlərin rəhbər şəxsləri və dövlət rəsmiləri iştirak edib. Dünya İqtisadi Forumunun idarəedici direktoru və Təbiət və İqlim Mərkəzinin rəhbəri Cim Huay iştirakçıları salamlayaraq dayanıqlı gələcək və sıfır emissiya hədəflərinə çatmaq üçün liderliyin rolunu vurğulayıb. DİF-in Təbiət və İqlim Mərkəzinin rəhbər şəxsləri və ekspertlərinin də qatıldığı görüşdə enerji keçidi, təbii resursların idarə edilməsi və iqlim tədbirlərinin gücləndirilməsi sahələrində strateji əməkdaşlıq məsələləri müzakirə olunub. Azərbaycan tərəfindən iqlim dəyişikliyi ilə mübarizədə ölkənin rolunun artırılması və emissiyaların azaldılması hədəflərinə nail olmaq üçün strateji təşəbbüslər qeyd olunub. Tədbir çərçivəsində həmçinin “Ambisiyadan fəaliyyətə: İqlim həlləri və siyasəti üçün əməkdaşlıq” adlı sessiya baş tutub. Sonda “Sıfır emissiya, təbiət üçün müsbət və sosial ədalətli gələcəyə nail olmaq üçün miqyasını genişləndirməli olduğumuz innovativ tərəfdaşlıqlar və investisiyalar hansılardır?” mövzusunda müzakirələr aparılıb.

#COP29 çərçivəsində İqtisadiyyat Nazirliyinin təşkilatçılığı ilə təşkil edilən İqlim, İnnovasiya və Ticarət üzrə #CAREC Tərəfdaşlığına həsr olunmuş Yüksək Səviyyəli Sessiya keçirilib. Asiya İnkişaf Bankının Mərkəzi və Qərbi Asiya üzrə Əməkdaşlıq və İnteqrasiya Departamentinin regional başçısı Ləzizə Sabirovanın moderatorluğu ilə keçirilən tədbirdə iqtisadiyyat naziri Mikayıl Cabbarov CAREC Proqramının regionun inkişafına töhfələrini vurğulayıb. Qeyd olunub ki, proqram müxtəlif sektorlar üzrə yüksək keyfiyyətli layihələrə, o cümlədən prioritet istiqamətlərə sərmayə qoymaqla regional əməkdaşlığın gücləndirilməsini dəstəkləyir. Diqqətə çatdırılıb ki, regionda mühüm nəqliyyat qovşağı olan Azərbaycan transsərhəd və tranzit prosedurlarının, logistikanın davamlı olaraq təkmilləşdirilməsində və ticarətin rəqəmsallaşmasında önəmli rol oynayır. Azərbaycanın CAREC ölkələri ilə ticarət və investisiya əlaqələrinin gücləndirilməsi üçün səylərin davam etdirildiyi bildirilib: “2024-cü ilin doqquz ayı ərzində Azərbaycan ilə CAREC-ə üzv dövlətlər arasında ticarət dövriyyəsi təqribən 4 milyard ABŞ dollarına çatıb, CAREC ölkələrinin Azərbaycanın ümumi xarici ticarətində payı isə 11,5 faiz təşkil edib”. Qeyd edilib ki, tədbir çərçivəsində imzalanan “İqlim, İnnovasiya və Ticarət üzrə CAREC Tərəfdaşlığına dair Bakı Bəyannaməsi” regionda sosial, iqtisadi və ekoloji sahələrdə təşəbbüsləri dəstəkləyən yeni platforma formalaşdıracaq. Asiya İnkişaf Bankının prezidenti Masatsuqu Asakava, Asiya İnkişaf Bankının Mərkəzi və Qərbi Asiya Departamentinin baş direktoru Yevgeni Jukov, 2024-cü il üzrə CAREC Proqramına sədrlik edən Qazaxıstanın Baş nazirinin müavini, milli iqtisadiyyat naziri Nurlan Baybazarov CAREC ölkələrinin tərəfdaşlığı, iqlim dəyişikliyinin mənfi təsirlərinə qarşı birgə tədbirlər, yaşıl layihələrin reallaşdırılması imkanları barədə fikirlərini bildiriblər. Sessiyada CAREC İqlim Dəyişikliyi Fəaliyyət Planı, CAREC İqlim və Davamlılıq Layihəsinə Hazırlıq Fondu və İqlim, İnnovasiya və Ticarət üzrə CAREC Tərəfdaşlığına dair təqdimatlar olub. Proqrama üzv olan ölkələr arasında İqlim, innovasiya və ticarət üzrə CAREC Tərəfdaşlığına dair Bakı Bəyannaməsi imzalanıb. #COP29Azerbaijan

#COP29 çərçivəsində “Əməkdaşlığın gücü: xalis sıfır üçün birgə səylər” mövzusunda Dünya İqtisadi Forumu (World Economic Forum) ilə Yüksək Səviyyəli Sessiyada iqlim məsələlərinə beynəlxalq maliyyə resurslarının cəlb olunması və davamlı inkişaf üçün tərəfdaşlıqların genişləndirilməsi müzakirə edilib. COP29 çərçivəsində İqtisadiyyat Nazirliyi, İxracın və İnvestisiyaların Təşviqi Agentliyi – AZPROMO və Dünya İqtisadi Forumunun təşkilatçılığı ilə “Əməkdaşlığın gücü: xalis sıfır üçün birgə səylər” mövzusunda Dünya İqtisadi Forumu ilə Yüksək Səviyyəli Sessiya keçirilib. Tədbirdə iqtisadiyyat naziri Mikayıl Cabbarov iqlim dəyişikliyinə qarşı birgə mübarizə səylərini ehtiva edən prinsiplər, bu sahədə yürüdülən qlobal siyasət və özəl sektorun töhfələri barədə fikirlərini bildirib. Qeyd olunub ki, bu məsələdə müsbət dəyişikliklərin təmin olunması üçün inklüziv tədbirlərin davamlılığı və dayanıqlı inkişafa nail olmaq önəmlidir. Qlobal müstəvidə iqlim məsələləri kontekstində bütün xalqları ehtiva edən ədalətli yanaşma da mühüm məsələdir. Azərbaycanın davamlı artım və yaşıl iqtisadiyyat sahəsində hədəfləri və görülən işlər barədə məlumat verilib. Ölkəmizdə yaşıl enerji məqsədlərinə çatmaq üçün qabaqcıl texnologiyaların və innovativ həllərin hazırlanması yönündə məqsədyönlü tədbirlərə diqqət çəkilib, bu sahədə beynəlxalq əməkdaşlığın vacibliyi vurğulanıb.

#KonstitusiyaGünü 

İqtisadiyyat naziri Mikayıl Cabbarov Avropa Yenidənqurma və İnkişaf Bankının (EBRD) birinci vitse-prezidenti Jurgen Rigterink ilə görüşüb. Görüşdə Azərbaycanın BMT-nin İqlim Dəyişikliyi üzrə çərçivə Konvensiyasının Tərəflər Konfransının 29-cu sessiyasında (#COP29) ev sahibliyi, qlobal iqlim fəaliyyətində aktiv iştirakı və AYİB-lə müxtəlif istiqamətlər üzrə uğurlu tərəfdaşlığı qeyd edilib. Bildirilib ki, ölkəmizin sosial-iqtisadi inkişaf hədəflərində yaşıl iqtisadiyyatın təşviqi mühüm yer tutur. Görüş zamanı Bankla yaşıl iqtisadiyyat, bərpa olunan və alternativ enerji mənbələrindən istifadə sahəsində birgə fəaliyyətin gücləndirilməsi, dövlət-özəl tərəfdaşlığının dəstəklənməsi, infrastruktur və digər istiqamətlər üzrə layihələrin icrası məqsədilə atılacaq addımlar müzakirə edilib. Əməkdaşlığın enerji sahəsində aşağı karbonlu həllərə keçid istiqamətində şaxələndirilməsinin əhəmiyyəti qeyd edilib. COP29 çərçivəsində Azərbaycan-AYİB tərəfdaşlığını gücləndirəcək platformaların perspektivləri müzakirə edilib. AYİB-in birinci vitse-prezidenti Yurgen Riqterink Bankın ölkəmizlə səmərəli əməkdaşlığını və COP29 çərçivəsində həyata keçirilən tədbirlərin önəmini qeyd edib. Azərbaycanın zəngin iqtisadi potensialının əlaqələrin genişlənməsi üçün perspektivlər yaratdığını və qurumun Azərbaycana dəstəyinin davamlı olacağını bildirib. Tərəflər Azərbaycan-AYİB əlaqələrinin dayanıqlı inkişaf və səmərəli iqlim fəaliyyəti üçün faydaları, birgə layihələrin perspektivləri barədə fikir mübadiləsi aparıblar. #EconomyAz

“Yerin müşahidəsi məlumatlarının iqlim problemlərinin həllində rolu” mövzusunda dəyirmi masa keçirilib COP29 çərçivəsində Dünya İqtisadi Forumu (DİF), İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin (4SİM) və “Deloitte” şirkətinin təşkilatçılığı ilə Yerin müşahidəsi icmasının üzvlərinin iştirakı ilə “Yerin müşahidəsi məlumatlarının iqlim problemlərinin həllində rolu” mövzusunda dəyirmi masa keçirilib. DİF-in Yerin Müşahidəsi Təşəbbüsünün icma üzvlərinin iştirak etdiyi tədbirdə Yerin müşahidəsi zamanı toplanılmış məlumatların iqlim və təbiət problemlərinin həllində istifadəsi, bu sahədə olan ən son texnologiya və inkişafla bağlı ekspertlər səviyyəsində müzakirələr aparılıb. Tədbirdə 4SİM-in icraçı direktoru Fariz Cəfərov sənaye 4.0 texnologiyalarının Azərbaycanın davamlı inkişaf strategiyasında oynadığı mühüm roldan danışıb. O, Azərbaycanın rəqəmsal iqtisadiyyat sahəsində yeni investisiyaları cəlb etmək və süni intellektin tətbiqi ilə enerji sektorunu təkmilləşdirmək üçün Dünya İqtisadi Forumu və digər tərəfdaşlarla əməkdaşlıq etdiyini vurğulayıb. “Deloitte” şirkətinin ABŞ-dəki Kosmik Tədqiqatlar departamentinin rəhbəri Brett Loubert DİF ilə birgə hazırlanmış Yerin müşahidəsi məlumatları ilə bağlı hesabat barədə məlumat verib. Qeyd olunub ki, Dünya İqtisadi Forumunun Yerin Müşahidəsi Təşəbbüsünün missiyası dayanıqlı iqtisadi artım üçün Yerin kosmosdan müşahidəsindən kommersiya məqsədləri ilə istifadəni genişləndirməkdir. Peyklər və digər sensorlar vasitəsilə Yerin müşahidəsi 2030-cu ilə qədər qlobal iqtisadiyyata 3,8 trilyon dollar əlavə dəyər qatmaq potensialına malikdir. Eyni zamanda bu texnologiyalar istixana qazı emissiyalarını hər il 2 qiqaton azaltmağa kömək edə bilər. Sonra iştirakçılar Yerin müşahidəsi məlumatlarının real dünya ssenarilərində necə effektiv şəkildə tətbiq olunması, tərəfdaşlıq modelləri və ən yaxşı təcrübələr, iqlim və ətraf mühitin dayanıqlılığı üçün Yerin müşahidəsi texnologiyalarının qəbulu və təşviqində liderlik mövzularında fikir mübadiləsi aparıblar.

Dayanıqlı inkişaf liderlərinin görüşü keçiriləcək Noyabrın 13-də Dünya İqtisadi Forumunun (DİF - World Economic Forum) 4-cü Sənaye İnqilabı Mərkəzləri şəbəkəsi və İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin (#4SİM) təşkilatçılığı ilə #COP29 çərçivəsində #iqlimfəaliyyəti və #dayanıqlıinkişaf sahəsində əməkdaşlıq mövzusunda liderlərin toplantısı keçiriləcək. Tədbirdə Dünya İqtisadi Forumunun rəhbər şəxsləri, hökumət və özəl sektor nümayəndələrinin iştirakı gözlənilir. Görüşdə enerji keçidi, təbii resursların idarə edilməsi və iqlim tədbirlərinin gücləndirilməsi sahələrində strateji əməkdaşlıq məsələləri müzakirə olunacaq.