[長文慎入]

今日有款遊戲想介紹下，呢款遊戲就係出自奈須蘑菇之手，TYPE-MOON嘅作品，一部以魔法使、魔女為題材嘅視覺小說，「魔法使之夜」。坦白講TYPE-MOON嘅型月遊戲系列、奈須蘑菇好幾部作品嘅大名我一早已經聽過，咁多年嚟我對奈須蘑菇嘅作品都好有興趣，但一直都未有機會開呢個坑，咁多部作品都唔知應該由邊部作品入手，上年終於等到呢部TYPE-MOON作品嘅高清重製版移植落Steam啦，既然係咁，籍住呢個機會，我就決定以魔法使之夜作為型月遊戲系列嘅入門作啦。

玩完之後，呢款遊戲真係幾正，不論劇情定角色都好吸引，典型冇乜選項嘅視覺小說玩法雖然冇乜遊玩性，但可以俾玩家更代入劇情同世界觀當中，武內崇標誌性嘅美術風格我都幾鍾意，唔少插畫同立繪都好靚，遊戲嘅配樂好多都好高水準，好多都好好聽，呢款遊戲嘅整體表現我相當滿意，我自己都幾鍾意。

咁首先等我介紹下呢款遊戲嘅劇情啦，呢款遊戲發生喺1989年嘅三咲町，據傳深山上嘅古老大宅會發生好多恐怖嘅事，更住咗兩位魔女，呢個傳聞令當地嘅居民一直唔敢靠近。從鄉村嚟到三咲町嘅轉校生靜希草十郎，某次機會遇見倒強勢嘅學生會會長蒼崎青子，以及孤高嘅神秘少女久遠寺有珠，呢次嘅相遇令呢三個角色嘅命運交織起嚟，令原本過住平淡生活嘅佢哋，捲入一連串事件當中，咁到底佢哋喺三咲町會遇到咩事？佢哋最終嘅命運又會點？如有興趣就自己買嚟體驗下啦。呢款遊戲嘅劇本我都幾鍾意，奈須蘑菇嘅劇本都幾啱我口味，呢款遊戲以視覺小說嚟講就唔算長，平均20個鐘就玩完，雖然遊戲劇本就唔算長，但遊戲內容都幾精彩、豐富，幾有追看性，越玩就越想知道劇情嘅發展。遊戲嘅劇本主要分為兩部分，分別係日常嘅部分同埋戰鬥嘅部分。日常嘅部分基本上佔咗劇本嘅六成，日常部分嘅情節相對輕鬆，睇住一眾角色各種有趣嘅互動，周不時都會睇到我笑睇聲。而戰鬥嘅部分就佔咗劇本其餘嘅四成，坦白講我一直覺得用文字嚟表達動作場面係好困難嘅事，點樣淨係用文字帶出戰鬥嗰種刺激感，就好考驗作者文筆嘅功力(或者只係我睇打鬥類嘅小說/視覺小說相對少)，不過玩嘅呢款遊戲嘅時候，我感覺到奈須蘑菇嘅文筆係做到呢個效果，透過對戰鬥場面精準嘅描述，配上精緻嘅CG圖，以及角色發動魔法嗰種華麗特效，令到劇本戰鬥嘅部分充滿緊張感同刺激感。遊戲嘅世界觀相當吸引，雖然遊戲有唔少奇幻設定(例如魔法、使魔)，但遊戲發生喺相對現實嘅社會，令玩家對於遊戲嘅背景冇咁大嘅抽離感，俾玩家更容易代入遊戲嘅世界觀當中。

呢款遊戲唔少角色我都幾鍾意，唔少角色嘅個性鮮明，令人印象深刻，角色塑造上可以話相當成功，那怕係前期冇咁討好嘅角色，得知佢哋嘅經歷後，都會對佢哋改觀。男主角靜希草十郎係個從偏僻鄉村到嚟嘅轉學生，由於本身住嘅鄉村係冇乜現代設施，凡係見倒一啲城市現代設施都會感到新奇，繼而感動，個性單純嘅佢總係容易識倒朋友，隨住旅途發展會漸漸揭露草十郎單純個性背後嘅另一面。女主角蒼崎青子係個相對強勢嘅學生會會長，遊戲初期我對於呢個角色嘅觀感一般般，但漸漸就俾呢個角色吸引住，表面嚴肅嘅佢，私底下都有性格惡劣嘅一面，成日都會做埋啲惡趣味嘅事，佢呢種反差都幾正，因為同草十郎嘅相遇以及各種經歷，令青子有所成長同改變，感覺都唔錯。睇住草十郎同青子呢兩個個性咁大差異嘅角色互動所產生嘅火花，感覺都幾過癮。第二女主角久遠寺有珠係個相對文靜嘅神秘少女，遊戲初期玩家嘅目光好似俾青子搶晒，變相會冇咁留意有珠呢個角色，但玩落就逐漸發現呢個角色嘅魅力所在，有珠感覺都幾可愛，絕對唔會輸俾青子。除咗呢幾位重要角色之外，其他個性豐富嘅配角都好吸引，例如因為行徑而被稱為殿下嘅副會長槻司鳶丸、草十朗學校嘅損友木乃美芳助、新人教師兼學生會顧問山城和樹、風趣嘅藍色知更鳥羅賓等等，玩嘅時候我都會想知道佢哋嘅故事。

而家等我介紹下呢款遊戲嘅玩法啦，呢款遊戲嘅玩法就係相對傳統、典型冇選項齋睇劇情嘅視覺小說玩法。坦白講齋睇劇情冇得作出選擇，繼而令遊戲冇劇情分支，玩家對於劇情嘅參與度明顯有所下降，遊玩度都有所下降，但基於遊戲出色嘅劇情，奈須蘑菇相當唔錯嘅文筆，令一眾玩家玩嘅時候唔會覺得悶，反而會好享受遊戲劇情，呢個安排令劇情嘅流暢度更加高，令玩家可以更容易投入遊戲豐富劇情同埋充滿奇幻設定嘅世界觀當中。而遊戲嘅劇本除咗本篇嘅故事之外，章節與章節之間有陣時仲會有隱藏嘅篇章以及番外篇，俾玩家用其他角色嘅視點嚟睇遊戲嘅故事，不過要留意返呢啲隱藏篇章以及番外篇都收錄喺書庫入面，唔特登開嚟睇，真係會好容易錯過咗。當每完成一個篇章，仲會解鎖各種精美嘅CG圖同插曲俾玩家欣賞。

呢款遊戲嘅美術風格我都幾鍾意，武內崇嗰種充滿特色嘅標誌性美術風格都幾啱我口味，精緻嘅角色立繪配搭聲優出色嘅演繹，令到角色更豐富、更立體。以一款視覺小說嚟講，遊戲嘅CG圖數量都未到話好多，但絕對稱唔上少，唔少嘅CG圖都好靚，精美嘅CG圖，加上各種光影效果同特效，淨係一張嘅CG圖，已經係視覺上嘅享受，遊戲嘅場景設計都充滿心思，好多都令人印象深刻，例如故事嘅主舞台平凡嘅三咲町、充滿英式風格嘅古老大宅久遠寺宅邸。呢款遊戲唔少配樂都好高水準，好多配樂都好正、好好聽。

總括嚟講，呢款遊戲真係幾正，不論劇情定角色都好吸引，典型冇選項嘅視覺小說玩法雖然冇乜遊玩性，但可以俾玩家更代入劇情同世界觀當中，武內崇標誌性嘅美術風格我都幾鍾意，唔少插畫同立繪都好靚，遊戲嘅配樂好多都好高水準，好多都好好聽，呢款遊戲我相當推薦，特別推薦俾鍾意視覺小說或者型月/奈須蘑菇嘅粉絲去品嘗呢部作品。原本魔法使之夜係計畫製作成三部曲，所以作為序章嘅第一集，呢款遊戲部分嘅細節同伏筆其實係冇解釋倒，但距離原作已經係12年前嘅事，未知隻續集仲要等幾耐啦。題外話魔法使之夜嘅劇場版已經製作緊，期待有朝一日可以喺大銀幕睇倒呢款遊戲嘅故事。

one of the best visual novels that i have played

蒼崎青子我老婆